இந்தியா-சிங்கப்பூர் அமைச்சர்கள் வட்டமேசை மாநாடு: 4 முக்கிய அமைச்சர்கள் பங்கேற்பு

சிங்கப்பூர், ஆகஸ்ட் 21: இந்தியா மற்றும் சிங்கப்பூர் இடையிலான இருதரப்பு உறவுகளை வலுப்படுத்தும் நோக்கில், 4-வது இந்தியா-சிங்கப்பூர் அமைச்சர்கள் வட்டமேசை மாநாடு சிங்கப்பூரில் சிறப்பாக நடைபெற்றது. இந்த உயர்மட்ட மாநாட்டில் இந்திய அரசு சார்பில் நிதியமைச்சர் நிர்மலா சீதாராமன், வெளியுறவுத்துறை அமைச்சர் எஸ். ஜெய்சங்கர், வணிகம் மற்றும் தொழில்துறை அமைச்சர் பியூஷ் கோயல் மற்றும் மின்னணு மற்றும் தகவல் தொழில்நுட்பத்துறை இணையமைச்சர் ஜித்தின் பிரசாதா ஆகியோர் கலந்துகொண்டு முக்கிய ஆலோசனைகளை மேற்கொண்டனர்.

சிங்கப்பூர் பிரதமர் லாரன்ஸ் வாங் மற்றும் துணை பிரதமர் கான் கிம் யோங் உள்ளிட்ட அந்நாட்டு அமைச்சர்களும் இதில் பங்கேற்றனர். வணிகம், முதலீடு, செயற்கை நுண்ணறிவு, நிதி சேவைகள் மற்றும் உணவு பாதுகாப்பு உள்ளிட்ட பல்வேறு துறைகளில் ஒத்துழைப்பை அதிகரிப்பது குறித்து விரிவாக விவாதிக்கப்பட்டது. இரு நாடுகளுக்கும் இடையே டிஜிட்டல் மயமாக்கல் மற்றும் மேம்பட்ட உற்பத்தி துறைகளில் புதிய ஒப்பந்தங்கள் கையெழுத்தாகியுள்ளன. இந்த மாநாட்டின் மூலம் இரு நாடுகளுக்கு இடையிலான பொருளாதார மற்றும் தொழில்நுட்ப உறவுகள் அடுத்த கட்டத்திற்குச் செல்லும் என எதிர்பார்க்கப்படுகிறது.

மேலும், விமான போக்குவரத்து மற்றும் கப்பல் போக்குவரத்து துறைகளை மேம்படுத்தவும், திறன் மேம்பாட்டு பயிற்சிகளை வழங்கவும் இருதரப்பிலும் ஒருமித்த கருத்து எட்டப்பட்டுள்ளது.