புதுச்சேரியில் ரூ.2.5 கோடி மோசடி வழக்கில் குற்றம் நிரூபிக்கப்பட்ட இருவருக்கு தலா 5 ஆண்டுகள் கடுங்காவல் சிறைத் தண்டனை விதித்து புதுச்சேரி தலைமை நீதித்துறை நடுவர் (சிஜேஎம்) நீதிமன்றம் தீர்ப்பளித்துள்ளது.
அபராதத் தொகை பாதிக்கப்பட்டவர்களுக்கு வழங்க உத்தரவு
நீதிமன்ற உத்தரவின்படி, இந்த வழக்கின் முக்கிய குற்றவாளிக்கு ரூ.50 லட்சமும், மற்றொரு குற்றவாளிக்கு ரூ.5 லட்சமும் அபராதம் விதிக்கப்பட்டுள்ளது. வசூலாகும் மொத்த அபராதத் தொகையான ரூ.55 லட்சத்தை, சட்ட நடைமுறைகள் முடிந்த பிறகு, மோசடியால் பாதிக்கப்பட்ட மக்களுக்கு விகிதாச்சார அடிப்படையில் பிரித்து வழங்க நீதிமன்றம் உத்தரவிட்டுள்ளது.
கடன் தள்ளுபடி செய்வதாகக் கூறி மோசடி
அரசு திட்டங்கள் மூலம் பெருந்தொகையைக் கடனாகப் பெற்றுத் தருவதாகவும், பின்னர் அந்தக் கடனைத் தள்ளுபடி செய்து தருவதாகவும் கூறி பலரிடம் பணம் வசூலிக்கப்பட்டது. இந்த வாக்குறுதியை நம்பிப் பணம் செலுத்தி ஏமாந்த பொதுமக்கள் அளித்த புகாரின்பேரில், சிபிசிஐடி போலீசார் விரிவான விசாரணை நடத்தி நீதிமன்றத்தில் குற்றப்பத்திரிகை தாக்கல் செய்தனர்.
வழக்கை விசாரித்த நீதிமன்றம், குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டதை அடுத்து இருவருக்கும் சிறைத் தண்டனையும் அபராதமும் விதித்து தீர்ப்பளித்தது.
